Allah Ke Rasool Sallallahu Alayhi Wa-sallam ne

farmaya:

Yaum al-Fitr (Eid al-Fitr) aur Yaum an-Nahar (Eid al-

Adha) aur Aiyyam-e-Tashreeq (11,12,13 Dhu al-Hijja)
humari Ahle Islaam ki Eidein hain, yeh khane ke din hain.
(Musnad Ahmad, Abu Dawud, Tirmizi, Nasa'i, Haakim)
Rawi Uqba bin 'Amir
[Saheeh ul-Jami' 8192] (Saheeh)
EIDAYN KI RAATON MEIN
QIYAM KI EK DA'EEF HADEES
Ibn Majah farmate hain:
Hum se Abu Ahmad al-Marrar bin Hammuya ne, un se
Muhammad bin al-Musaffa ne, un se Baqiyya bin al-
Waleed ne, un se Shaur bin Yazeed ne, un se Khalid bin
Ma'dan ne aur un se Abu Umama ne Hadees bayan ki ke
Nabi Sallallahu Alayhi Wa-sallam ne farmaya: Jis ne
dono Eidayan ki (Eid al-Fitr aur Eid al-Adha) raaton ko
Allah se sawab ki ummid rakhte huye Qiyam kiya, toh us
ka dil us din murdah na hoga jis din tamam quloob
murdah ho jayenge.
(Ibn Majah) Rawi Abu Umama
[Da'eef al-Jami' 5742, Ad-Da'eefah 521] (Da'eef)
1. FASL: EIDGAAH JANE SE QABL

1. EIDGAAH JANE SE QABL GHUSL

KARNA
Nafi' Rahimahullah farmate hain:

Abdullah bin 'Umar RadhiAllahu Anhuma Eid al-

Fitr ke din Eidgaah jane se pehle ghusl kiya karte
thein.
[Muwatta: An-Nidaa' lis-Salat 384]
2. EID KE DIN ZEENAT IKHTIYAR
KARNA
Abdullah bin 'Umar RadhiAllahu Anhuma farmate hain:

'Umar RadhiAllahu Anhu ne Bazaar mein dekha, ek mota resham

ka kapda bik raha tha, aap usey Allah ke Rasool Sallallahu Alayhi
Wa-sallam ke paas le kar aaye aur kaha: Ai Allah ke Rasool! yeh
kapda khareed lijiye, Eid aur Wufood ki aamad par is se zeenat
ikhtiyar kijiye. Rasool Allah Sallallahu Alayhi Wa-sallam ne
farmaya: yeh libaas un logon ke liye hai jin ka aakhirat mein koi
hissa nahin hai.
[Bukhari: al-Eidayan 948]
 Nafi' Rahimahullah farmate hain:

Ibn 'Umar RadhiAllahu Anhuma Eidayn ke liye apna sab se achha

libaas pehna karte thein.
[Bayhaqi fi Sunan: Salat al-Eidayn: 6363]

3. EID KE DIN ROZA

Abu Hurairah RadhiAllahu Anhu farmate hain:

Rasool Allah Sallallahu Alayhi Wa-sallam ne Yaum al-Adha aur

Yaum-e-Fitr mein Roza rakhne se manah farmaya hai.
[Muslim: As-Siyaam: 1921]
4. EIDGAAH NIKALNE SE PEHLE KHANA

Anas bin Malik RadhiAllahu Anhu farmate hain:

Rasool Allah Sallallahu Alayhi Wa-sallam Yaum al-Fitr ke din

(Namaaz ke liye) Taaq adad Khajoorein khaye beghair nahin
nikalte thein.
[Bukhari: Al-Eidayn: 953]

2. FASL: EID KI NAMAAZ

1. NAMAAZ KE LIYE EIDGAAH JANA

Abu Sa'id Khudri Radhiallahu Anhu farmate hain:

Rasool Allah Sallallahu Alayhi Wa-sallam Eid al-Fitr aur Eid al-
Adha ke din Eidgaah jaya karte thein. [Bukhari: Al-Eidayn 956]
3. FASL: NAMAAZ-E-EID MEIN
TAKBEERAT

1. EID AL-FITR KI NAMAAZ MEIN

TAKBEERAT
Ibn Abbas RadhiAllahu Anhuma farmate hain:

Musalmano par Haqq hai ki jab woh Shawwal ka chand dekh lein
toh takbeer kehna shuru kar dein yahan tak ki eid se farigh ho
jayein. Kyunki khud Allah Ta'ala ne is ka zikr karte huye
farmaya: Aur taki tum ginti poori kar lo aur Allah ki di huyi
hidayat par Us ki takbeer bayan karo.
[Tafseer at-Tabari: Fee Tafseer Ayah al-Baqarah 185 Raqam
2380]
2. NAMAAZ KE LIYE TAKBEER KEHTE
HUYE JANA
Zuhri Rahimahullah farmate hain:

Rasool Allah Sallallahu Alayhi Wa-sallam Eid al-Fitr ke din

Eidgaah nikalte toh Takbeer kehte huye jate hatta ki Eidgaah
pahunchh jate aur Namaaz padh lete jab Namaaz se farigh ho jate
toh Takbeer kehna band kar dete.
(Ibn Abee Shaybah) [As-Saheehah Raqam 171]

Shaykh al-Albani kehte hain is ki sanad agar Mursal na hoti toh is

ka darjah Saheeh ka hota albatta isey ek mausool shahid se taqwat
milti hai jise Bayhaqi ne riwayat kiya hai.
3. EIDGAAH PAHUNCHNE TAK
TAKBEER KEHNA
Ibn 'Umar RadhiAllahu Anhuma se riwayat hai:

Aap RadhiAllahu Anhuma Eid ke din Eidgaah jane aur Imaam ke

aane tak baland aawaz se Takbeer kehte.
[Ibn Abee Shaybah: As-Salwat 5609]
4. AURATEIN TAKBEER KEHNA?
Umm 'Attiyah RadhiAllahu Anha farmati hai:

Humein Eid ke din Eidgaah jane ka hukum diya jata, hum apne
saath Pardahposh Kunwariyan aur Ha'izah Khawateen ko bhi le
lete aur mardon ke pichhe rehte aur unki Takbeer ke saath
Takbeer kehte aur unki Duaa'on mein sharik hote aur us din ki
barkat aur pakeezgi hasil karne ki ummid rakhte.
[Bukhari: al-Eidayn 971- Muslim: Salat al-Eidayn 1474 mein isi
tarah hai]
4. FASL: AURATEIN AUR BACHCHE
EIDGAAH MEIN HAZRI
1. AURATEIN HATTA KI HA'IZAH BHI
EIDGAAH MEIN
Umm 'Atiyyah RadhiAllahu anha farmati hai:

Humein Eidayn ke din Eidgaah jane aur humare saath Ha'izah aur
Pardewaliyon ko nikalne ka hukum diya jata. Yeh Khawateen
Musalmano ki Jama'at aur unki Duaa'on mein sharik hoteen, albatta
Ha'izah Musalla se door rehteen, (is hukum par) ek Aurat ne kaha: Ai
Allah ke Rasool! Hum mein se kisi ke paas Jilbaab nahin hota. Aap ne
farmaya: Us ki saheli usey apne Jilbaab mein se udhaye.
[Bukhari: As-Salat 351]
2. AURATEIN KHUSBOO LAGAKAR NA
NIKLEIN
Allah ke Rasool Sallallahu Alayhi Wa-sallam ne farmaya:

Allah ki bandiyon ko Masjidon se na roko, albatta woh Khusboo

lag kar na nikle.
(Musnad Ahmad, Abu Dawud) Rawi Abu Hurairah
[Saheeh al-Jami' 7457] (Saheeh)

Allah ke Rasool Sallallahu Alayhi Wa-sallam ne farmaya:

Jo koi Aurat is tarah Khusboo lagye ke jab logon ke saamne se

guzre toh log us ki khusboo mahsoos karein, woh zaniyah hai.
(Musnad Ahmad, Nasa'i, Haakim) Rawi Abu Musa
[Saheeh al-Jami' 2701] (Hasan)
3. KHAWATEEN RASTE MEIN KAISE
CHALEIN?
Aaseed al-Ansari RadhiAllahu Anhu farmate hain:

Maine Rasool Allah Sallallahu Alayhi Wa-sallam ko farmate

huye suna, jab Aap Masjid se bahar nikal rahe thein aur raste
mein Auratein aur Mard ek doosre mein mukhtalat ho rahe the.
Rasool Allah Sallallahu Alayhi Wa-sallam ne Auratonj se
farmaya: zara theher jao, tumhara beech raste mein chalna durust
nahin balki raste ke kinare se chalo. Us ke baad Auraton ka haal
 yeh tha ke woh deewaron se lag kar chalne lageen yahan tak ki
baaz ka kapda deewar mein (kisi cheez se) ulajh jata.
(Abu Dawud) [As-Saheehah 856, Saheeh al-Jami' 929] (Hasan)

1. EIDGAAH MEIN BACHCHE

Ibn Abbas RadhiAllahu Anhuma farmate hain:

Maine Nabi Sallallahu Alayhi Wa-sallam ke saath Eid al-Fitr ya

Eid al-Azha ko nikla. Aap ne Namaaz padhi aur Khutbah diya
phir Auraton ke paas gaye aur unhein waaz wa nasheehat ki aur
unhein Sadqa ka hukum diya.
[Bukahri: al-Eidayn 975]

[Note: Allah ke Rasool Sallallahu Alayhi Wa-sallam ke daur

mein Ibn Abbas RadhiAllahu Anhuma khud Bachche thein
(Izafa)]
 5. FASL: NAMAAZ KO JANE KI KAIFIYAT
KA BAYAN

1. PAIDAL EIDGAAH KI TARAF

Ali bin Abi Talib RadhiAllahu Anhu farmate hain:

Sunnat yeh hai ki Eidgaah Paidal jaye.

(Tirmizi) [Irwa' Jild 3 Safa 103 Raqam 636] (Hasan)

2. AANE AUR JANE KA RASTA BADALNA

Jabir bin Abdullah RadhiAllahu Anhu farmate hain:

Nabi Sallallahu Alayhi Wa-sallam Eid ke din ek raste se jate aur doosre
se aate.
[Bukhari: al-Eidayn 986]
 6. FASL: EIDAYN KI NAMAAZ KE
AHKAAM
1. EID KI NAMAAZ KA WAQT
Yazid bin Khumair Ar-Rahabi Rahimahullah farmate hain:

Rasool Allah Sallallahu Alayhi Wa-sallam ke Sahabi Abdullah bin Busr

RadhiAllahu Anhu ek din logon ke saath Eid al-Fitr ya Eid al-Adha ke
din Eidgaah ki taraf nikle toh Imaam ki ta'kheer se aap barhum huye aur
farmaya: "Is waqt tak toh hum Namaaz se farigh ho jaya karte thein."-
yeh Salat al-Duha ka waqt tha.
(Abu Dawud, Ibn Majah)
[Irwa' al-Ghaleel Jild 3 Safa 101 Tahat Raqam 632] (Saheeh)
2. IMAAM SE PEHLE NAMAAZ PADHNA
Ibn Abbas RadhiAllahu Anhuma farmate hain:

Nabi Sallallahu Alayhi Wa-sallam Eid al-Fitr ko nikle aur 2

Raka'at Namaaz padhi. Aap ne Eid ki Namaaz se pehle aur us ke
baad koi Namaaz nahin padhi, aur Aap ke saath Bilal
RadhiAllahu Anhu thein.
[Bukhari: al-Eidayn 989- Muslim: Salat al-Eidayn 1476]
Ibn 'Umar RadhiAllahu Anhuma se riwayat hai:

Aap RadhiAllahu Anhuma Eid ke din nikle aur Eid ki Namaaz se

pehle aur baad mein koi Namaaz nahin padhi aur farmaya ki Nabi
Sallallahu Alayhi Wa-sallam ka yehi amal tha.
(Tirmizi) [Sunan at-Tirmizi biTahqeeq al-Albani 538]
[Irwa' Jild 3 Safa 99 Raqam 631] (Hasan Saheeh)
 Sha'labah bin Zahdam Rahimahullah farmate hain:

Ali RadhiAllahu Anhu ne Abu Mas'ood RadhiAllahu Anhu ko

logon ki Imaamat ke liye apna na'ib banaya. Aap RadhiAllahu
Anhu Eid ke din nikle aur farmaya: Ai Logon! Imaam ke aane se
qabl (Nafl) Namaaz padhna Sunnat nahin hai.
(Nasa'i) (Sunan an-Nasa'i biTahqeeq al-Albani 1561]
(Saheeh ul-Isnaad)

3. EIDAYN KI NAMAAZ MEIN AZAN AUR

IQAMAT
Ibn Abbas aur Jabir bin Abdullah RadhiAllahu Anhuma farmate
hain:

(Allah ke Nabi Sallallahu Alayhi Wa-sallam ke zamane mein)

Eid al-Fitr aur Eid al-Adha ki Namaaz ke liye Azan nahin di jati
thi. [Bukhari: al-Eidayn 960]
 Jabir bin Samurah RadhiAllahu Anhu farmate hain:

Maine ek do baar nahin kayi martaba Allah ke Rasool Sallallahu

Alayhi Wa-sallam ke saath beghair Azan wa Iqamat Eid ki
Namaaz padhi hai.
[Muslim: Salat al-Eidayn 1470]

4. EIDAYN KI NAMAAZEIN 2 RAKA'AT

'Umar RadhiAllahu Anhu farmate hain:

Safar ki, Jumu'ah ki, Fitr aur al-Adha ki Namaaz 2 Raka'at hai jo
Allah ke Rasool Sallallahu Alayhi Wa-sallam ki zubaani
mukammal hai qasr nahin hai.
(Musnad Ahmad, Ibn Majah) [Saheeh Ibn Majah 872]
5. EIDAYN MEIN ADAD E TAKBEERAT

Aaishah RadhiAllahu Anha farmati hain:

Rasool Allah Sallallahu Alayhi Wa-sallam Eid al-Fitr aur Eid al-
Adha ki Namaaz mein pehli raka'at mein 7 aur soosri mein 5
zay'ed Takbeer kehte thein.
(Abu Dawud) [Saheeh Abee Dawud 1018] (Saheeh)
6. HAR RAKA'AT MEIN ZAYED
TAKBEERAT QIRA'AT SE PEHLE
Nafi’ Rahimahullah farmate hain:

Maine Abu Hurairah RadhiAllahu Anhu ke saath Eid Al-Adha

aur Eid al-Fitr ki Namaaz padhi, Aapne pehli raka'at mein qira'at
se pehle 7 aur doosri mein qira'at se pehle 5 Takbeerein kaheen.
[Al-Muwatta: An-Nida' lis-Salat : Baab Ma Ja' fi at-Takbeer wal-
Qira'at fi Salat ad-Eidayn]
Ibn Abbas RadhiAllahu Anhuma se riwayat hai:

Aap Eid ki Namaaz mein pehli raka'at mein Takbeer-e-Tahreema

ke saath 7 Takbeerein aur doosri raka'at mein Qiyam ki Takbeer
ke saath 6 Takbeerein kaheen, yeh tamam Takbeerein Aapne
qira'at se pehle kaheen.
(Ibn Abee Shaybah) [Irwa' Jild 3 Safa 111 Tahat Raqam 639]
(Saheeh)
7. HAR 2 TAKBEER KE DARMIYAN KYA
KAHEIN?
Abdullah nin Mas'ood RadhiAllahu Anhu Eid ki Namaaz ke mutalliq
farmate hain:

Har 2 Takbeer ke darmiyan Allah ki Hamd wa Sana' bayan ki jaye.

(Al-Mahaamilee fi "Salat al-Eidayn" Bayhaqi fi Sunan)
[Irwa' Jild 3 Safa 115]
8. EID KI NAMAAZ MEIN PADHI JAANE
WALI SURATEIN
Nu’man bin Basheer Radhi Allahu Anhu farmate hai:

Rasool Allah Sallallahu Aalaihi Wasallam Eidayn ki aur

Jumu'ah ki Namaaz mein
    

(Sabbihi isma Rabbika al-aAAla)

aur
     

(Hal ataka Hadeesu alGhashiyati)

padha karte thein, aur farmate hain: agar kisi din Eid aur
Jumu'ah jama ho jaate toh yehi dono suratein Aap (Eid
aur Jumu'ah) dono Namaazon mein padhte thein.
[Muslim: Al-Jumu'ah 1452]

Ubaidullah bin Abdullah Rahimahullah farmate hai:

Umar bin Khattab Radhi Allahu Anhu ne Abu Waqid Al
Laisi se pucha: Rasool Allah Sallallahu Aalaihi Wasallam
Eid-ul-Adha aur Eid-ul-fitr ki Namaaz mein kya padhte
thein? Unhune jawaab diya: Aap Sallallahu Aalaihi
Wasallam dono Namaazon mein
    


(Qaf waalQur'ani almajeedi)

aur
    

(Iqtarabati alsSaAAatu wainshaqqa alqamaru)

padha karte thein. [Muslim: Salatul Eidayn 1477]
9. EID AUR JUMU’AH EK HI DIN AAYE
Nu'man bin Basheer Radhi Allahu Anhu farmate hai:

Rasool Allah Sallallahu Aalaihi Wasallam Eidayn ki aur

Jumu'ah ki Namaaz mein
    

(Sabbihi isma Rabbika al-aAAla)

aur
    

(Hal ataka Hadeesu alGhashiyati)

padha karte thein, aur farmate hai: agar kisi din Eid aur
Jumu’ah jama ho jaate toh yehi dono suratein Aap dono
Namaazon mein padhte thein.
[Muslim: Al Jumu'ah 1452]

Abu Huraira Radhi Allahu Anhu farmate hai ke Allah ke Rasool

Sallallahu Aalaihi Wasallam ne farmaya:

Aaj dono Eidein jama ho gayee hai, lihaza jo Eid ki Namaaz par iktefa'
karna chahta hai toh yeh uske liye Jumu’ah ke badle kafi hai, magar
Hum toh Jumu’ah padhengen.
(Abu Dawood, Ibn Majah, Haakim) Rawi Abu Huraira
(Ibn Majah) Rawi Ibn Abbas aur Ibn 'Umar
[Saheeh Al-Jami' 4365] (Saheeh)
Muhammad bin Ali bin al-Husain bin Ali bin Abee Talib farmate hai:

Ali Radhi Allahu Anhu ke zamane mein do Eidein jama hogayee, Aap
eid ki Namaaz mein aaye aur kaha: Aaj hum Jumu’ah padhengen jo is
mein hazir hona chahta hai wo aaye.
[Ibn Abee Shaybah: As-Salaat Jild 2 Safa 92]
7. FASL: EID KE KHUTBA KE AHKAAM
1. EID KA KHUTBA NAMAAZ KE BAAD .

Ibn Umar Radhi Allahu Anhuma farmate hai:

Rasool Allah Sallallahu Aalaihi Wasallam, Abu Bakr wa Umar Radhi

Allahu Anhuma Eid ki namaaz khutba se pehle padha karte thein.
[Bukhari: Al-Eidayn 963, Muslim: Salatul Eidayn 1471]
2. KYA KHUTBA-E-EID MEIN BAITHNA
LAZMI HAI?
Abdullan bin Al-Saib Radhi Allahu Anhu farmate hai:

Main Rasool Allah Sallallahu Aalaihi Wasallam ke saath Eid ki Namaaz

mein shareek huwa, jab Aap ne Namaaz mukammal ki toh farmaya:
Hum Khutba deingen so jo khutbe ke liye baithna chahta hai wo baith
jaye aur jo jana chahta hai hai chala jaye.
(Abu Dawood) [Saheeh Abi Dawood 1024] [Saheeh]
3. KHUTBE KI KAIFIYAT.
Jabir bin Abdullah Radhi Allahu Anhu farmate hai:

Rasool Allah Sallallahu Aalaihi Wasallam jab khutba diya karte toh Aap
ki aankhein soorkh ho jaate, Aap ki awaaz buland ho jaati aur Aap behat
josh mein hote yahan tak ke yun mehsoos hota goya Aap kisi lashkar se
aagah karne wale hai.
[Muslim: Al Jumu'ah 1435]
4. LOG KHUTBA SUNNE KE LIYE SAFON
MEIN HI BAITHE RAHE.
Abu Sayeed Al Khudri Radhi Allahu Anhu farmate hai:

Rasool Allah Sallallahu Aalaihi Wasallam Eid-ul-fitr aur Eid-ul-Adha

ko Eidgaah jaate, sab se pehle Aap Namaaz padhte phir safon mein
baithe huwe logon se rubaru hote aur inhe waaz wa nasihat karte aur
ahkamaat batlate aur kahin lashkar bhejna hota toh bhej dete ya kisi
cheez ka hukum dena hota toh hukum dete phir laut aate.
[Bukhari: Al-Eidayn 956- Muslim Salatul Eidayn 1472]
8. FASL: AGAR EID KI NAMAAZ FAUT HO
JAYE

1. EID KI NAMAAZ KI QAZA'

Abu Umair bin Anas bin Malik Ansaari apni ansaariya phoophi Radhi
Allahu Anha se riwayat karte hain:

Kuch logon ne chand dekha toh Nabi Sallallahu Aalaihi Wasallam ke

paas pahunche aur Aap ko is ki khabar di, dopahar ka waqt ho chuka tha,
Aap Sallallahu Aalaihi Wasallam ne logon ko iftar karne aur dusre din
Eidgaah aane ka hukum diya.
(Nasa'i) [Sunan An Nasa'i BiTahqeeq Al-AlBani 1557] (Saheeh)
Abu Umair bin Anas bin Malik Ansaari farmate hai:

Meri Ansariya phoophi Radhi Allahu Anha ne mujse hadees bayaan ki:
logon ne kaha: Humein Eid ka chand nazar nahi aaya so hum roze se the,
din ke aakhri peher ek wafd aaya aur Nabi Sallallahu Aalaihi Wasallam
ke paas gawahi di ke unhone kal chand dekha tha, is par Nabi Sallallahu
Aalaihi Wasallam ne logon ko iftar karne aur dusre din Eidgaah aane ka
hukum diya.
(Ibn Majah) [Saheeh Sunan Ibn Majah 1340] (Saheeh)
2. KISI KI EID KI NAMAAZ CHHOOT JAYE.
Imam Bukhari Rahimahullah farmate hain:

BAAB AGAR KISI KI EID KI NAMAZ CHHOOT JAYE TOH

WOH DO RAKA'AT PADH LEY.
Isi tarah auratein bhi kare aur wo log bhi jo gharon aur dehaton mein ho,
is liye ke Nabi Sallallahu Aalaihi Wasallam ne farmaya: yeh humari
Ahle Islam ki Eid hai. Aur Anas bin Malik ne apne gulam Ibne Abee
Utba ko bhi isi tarah karne ka hukum diya tha, lihaza unhune apne biwi
bachcho ko jama kiya aur shehar walon ki tarah Namaaz padhi aur
takbeer kaheen. Aur Ikrima farmate hai: shaher ke aas paas wale bhi jis
tarah Imaam karta hai usi tarah kare. Aur 'Ata farmate hai: agar kisi
ki Eid ki Namaaz faut ho jaye toh woh do rakt padh ley.
(Bukhari ne isey Taliqan "Al-Eidayn" mein zikr kiya hai)

3. EID KE DIN AGAR APNE BHAI SE

MULAQAAT HO TOH KYA KAHE?
Ibn Hajar Rahimahullah farmate hai: Aur humne "Mahaamileeyat"
mein Jubair bin Nafeer Rahimahullah se Hasan sanad ke saath riwayat
naqal ki jis mein hai:

Rasool Allah Sallallahu Aalaihi Wasallam ke Sahaba jab Eid ke din ek

dusre se milte toh kehte
"Taqabballahu Minna Wa Mink”
(Allah hum se aur aap se qubool farmayein)
[Fath Al-Bari: Al Eidayn: Baab Sunnatal Eid Li-Ahlil Islam]
Ek riwayth mein hai :

"Taqabballahu Minna Wa Minkum"

(Allah hum se aur aap sab se qubool farmayein)
[Is Hadees ko Abul Qasim al-Asbahanee ne apni Kitaab "At-Targheeb
wat-Tarheeb" mein riwayat kiya hai.] [Tamam al-Minnah, Safa 355]
4. EID KE DIN MUBAH KHEL KHELNA
AUR ACHCHYE ASH'AAR PADHNA.
Aaisha Radhi Allahu Anha farmati hai:

Abu Bakr Radhi Allahu Anhu humare yahan aayen toh mere paas do
ansari ladkiyan Ash'aar padh rahi thi jo Ansaar ne Jung-e-Buaas mein ek
dusre se kehte the. Yeh ladkiyan asal mein gane waliyan na thi. Abu
Bakr Radhi Allahu Anhu ne farmaya Rasool Allah Sallallahu Aalaihi
Wasallam ke ghar mein shaytaan ki saaz? Aur yeh Eid ka din tha, is par
Rasool Allah Sallallahu Aalaihi Wasallam ne farmaya: Aye Abu Bakr,
har qaum ki ek Eid hoti hai aur yeh humari Eid hai.
[Bukhari: Al Eidayn 952]

Aaisha Radhi Allahu Anha farmati hai:

Eid ke din kuch SuDaani dhaalon aur barchon se kartab dikha rahe thay,
ya toh maine Nabi Sallallahu Aalaihi Wasallam se pucha ya Aap ne
farmaya : kya tum yeh dekhna chahti ho? Maine kahan : " haan " Aap ne
mujhe Apne pichey khada kiya, mera rukhsaar Aap ke rukhsaar par tha
aur Aap keh rahe thein : ladho aye Bani Arfidah! Yahan tak ke main
ukta gayee. Aap ne farmaya : kafi hai? Maine kahan : han. Aap ne
kahan: theek hai, jaao.
[Bukhari: Al-Eidayn 950]