TANGRUALA HMALATUTE

Chhûngkaw Enkawlnaa Mawhphurhna Inchhâwk Tawn Tur

Lungrual tak leh thahnemngai takin nu leh pate chuan kawng dika an fate kaihhruaina hna an
kova innghat chu an thawk dun tur a ni. 1 Nu leh pate chu fate enkawlnaah lungrual sela, an
ngaihdan pawh inang rawh se. Mahse nu leh pa tam tak awmdân chu chhim leh hmar ang hlauh
a nih avangin an fate pawhin an tuar khawp mai. A châng phei chuan pakhat zâwk a khauh lutuk
leh pakhat zâwk chu a dul lutuk a. He ngaihdan inang lo hian a tha zawnga an fate an hruaina
tur pawh a dal hlauh a ni. Mihring siam that nana intihluih vak vak a tha lo ang bawkin dul êm
êma inenkawl pawh a tha chuang miah lo. Nu chuan a fate sual chu a pasal lakah a thuppui tur a
ni lo va, a pasalin tih loh tur a tihte a rûka tilui turin a fate chu a fuih tur a ni hek lo. Pa berin
chhûngkua a enkawl dan chu a faten an rintâwk loh theih dan tur zâwngin engmah a titur a ni lo
va. Amah pawhin a pasal thiltih dan dodal zawngin engmah a titur a ni hek lo. 2

Nu leh pate ber an inlungrual loh va, pakhatin pakhat zâwk duhdan a kalh fek fek chhung chuan
chu mite chhûngkua chu kehchhe mai thei dinhmunah an ding reng a, an nupa chuan a tua mah
mahin chhûngkaw inenkawl fel tak ni tura thil pawimawh nu leh pa zahna leh rintawkna chu an
fate lak atang chuan an dawng lo vang. Naupangte hian chhûngkaw inawpna dan lan chhuahna
thil reng reng, a bikin anmahni khapna lam hawi chu an hre thiam zung zung mai a ni. 3

Nu leh pate chu fate thununna-ah lungrual sela; Pathian hmâ-ah a theih anga thaa hriselna leh
nungchang tha tak mai nei tura an fate zirtîr turin an intiam tawh tih inhriatna nen an nupa
chuan an kova mawhphurhna tla chu la ve ve rawh se. 4

Bumna Inzirtîr A Nih Dan

Uchuak taka fate duat ching nu thenkhat chuan mitkhap kâr lek pawh a awm an phal loh tur
sualna chu an fate chungah chuan an awmtir thîn. An fate sualna chu an pa lakah chuan an
zêpbo pui a. Pa berin hria se a phal miah loh tur ang chi incheina tlereuh eng engemawte chu
phalsakin an inthupsak thîn. Hetiang hian nu chuan a fate chu inbum dan a zirtîr thin a. Pa ber
chuan thil dik lo pawh chu han man chhuak tehreng se chhuanlam siamin thudik chanve
chauhte an hrilh a. A pasal tân chuan a rilru a hawng tak tak lo a ni.

Amah ang bawkin a pasal chuan a fate chu a ngaihtuah ve tihte leh sualna chu a puitlin tak tak
hmaa hmeh mih tur a nih avangin a pasal lakah chuan engmah a zêp tur a ni lo tihte chu hre
awm tak a ni naa chutiang zâwng chuan a ngaihtuah lo va; engkim mai chu thup vek a ni.
Naupangte chuan an nu leh pate tanrual lohzia chu an hre chiang a, chu chuan rah a nei ta. An
têt lai atang chuan mi bum dan leh thil zêp then dan an lo zir chho va, an nu lam atanga thil lan
dan leh pa lam atanga a landan azira thil sawi an chîng chho ta bawk a. Hniak phâwi miah lova
dâwt han sawi liam puat te, thil a lova luak chhuaka sawite an lo ching hlen ta thin a ni.

Hetiang thil dik lote hi nuin amah ang bawka fate ngaihtuah ve êm êm a pasal laka an fate
awmdân a thup thin vanga lo awm a ni. A pasal chu zêp awm miah lovin thil sawipui se, a bulah
chuan engmah thup tît têt lovin puang vek se ni tur a nia. Mahse chutiha hnêkin a fate sualna
chu a zêp tlat a, chu chuan mi bum duhna te rinawm lohnate leh dâwtsawi hreh lohnate a
neihtîr a ni. 5

Kristian nu leh pate chuan an fate an awpna chungchângah lungrual taka an thawh dunna tur
dan nghet tak an nei tur a ni. He thila nu leh pa thenkhat dik tâwk lohna chu an nupa an
tangrual hlawl lo hi a ni ber. Pa dik lohna chu awm ve bawk thin mahse a tam zâwkah chuan nu
thiam loh a ni fo. Nu chuan a fate chu a duat hlur ringawt bâkah an duh duhin a awmtîr a. Pa
ber lah chu a eizawnna avangin chhuah fo a tûl a, nu angin a fate a kuah ve fo hman lo.
Chuvangin nu chuan an fate chu a hneh hmâ zâwk daih a, a awmdân leh nungchangte chuan
naupangte nungchang siamnaah kori a tu nasa êm êm bîk a ni. 6

Nu leh Pa Inthurual Lovin Fate An Tibuai

Chhûngkua chu fel taka inrelbawl tur a ni. Nu leh pa chuan an mawhphurhna chu ngaihtuah dun
sela, chu an mawhphurhna hriat chianna nen chuan an hna ve ve chu thawk rawh se. An
ngaihdan a inkalh tur a ni lo va. An fate awm lai phei chuan an thiltih dan chu an insawiselsak
tawn miah tur a ni lo. Nu chu Pathian hriatna lama mi thar a nih chuan thil thleng pakhatin thil
dang a nghawng dante ngaihtuahin a fate a thununna chu a pasalin naupangte chhandam a
tumnaa a harsatna belhchhahtu a ni em tihte hriat tum sela. LALPÂ kawng ka zawh mêk em? tih
hi a rilrua zawhna pawimawh ber lo ni reng rawh se. 7 Nu leh pate chu an inrem lo a nih pawhin
fate awm loh lâi chuh se, an inrem theih hmâ chu an sawi dun tur a ni. 8

Chhûngkaw inenkawlna-ah nu leh pate an inthurual lo fo mai. Fate bula awm tlêm zâwk pa ber
chuan a fate awmdân diktak, an sual an that dan hre hawt lovin a vin ve khur khur ringawt zel a.
A thinrim insum zo lo chuan a duhna ringawt chu a kalpui bawk a. Hei hi a fate pawhin an hre
chiang a, chuvangin a pa hauhna chu zawm ahnêkin a hremnate chuan a tithinur zâw hlauh
thîn. Nu zâwk lah chuan a fate sualna inang reng chu a chang leh a ngaidam a, a chang leh na
fêin a hrem leh lawi a. Naupangte pawhin enge beisei tur an hre lo va, eng chen nge hrem lohva
thil an tihsual theih en chhin an châk phah a; tichuan sualna chi a lo tiak a, a rah hmâ hle
lehnghâl. 9

Fate thununnaa nu leh pa an tanrual chuan naupang pawhin eng ti tura beisei nge an nih an hre
thiam mai ang. Mahse pa chuan nuin a fate a enkawl dan chu tha a tih loh thu naupang hriata a
sawi chhuah a, a hmêlah a tihlan bawk a, a khawng lutuk nia a hriat avanga fate thlêm dam
nana a lo duat vel emaw, a lo thlahzal emaw a nih chuan an fate chu an chhe vek a ni mai. An
duh duhin an awm thei tih an hre thuai ang. Fate chunga hetiang thil sual titute hian an fate
thlarau boral chungchângah chuan mawh an la phur dâwn a ni. 10

Vantirhkohte chuan chhung tinte hi engtin nge an nu leh pa, an thiante leh an chhungten
naupang an enkawl tih hriat châkin an lo thlîr reng a. Fa enkawl dana nu leh pa ngaihdan inang
lovin vantirhkohte hnêna chhûngkaw inenkawlna mumal lo tak tak a hmuhtîrte chu a va mak
êm! Nu leh pa tawngkam leh hmêl landante chuan fate enkawlnaa an inthurual loh dante chu
chiang takin a lantîr a ni. Pa chuan nu chu hmêl hlim a hmuh ngai lo va, a awmdân chuan a fate
pawh nu hmangaihna leh duatna a ngaihnêptir a. Nu lah chuan pa chu a khawngin a khirh lutuk
a, chuvangin a ni talin a fate chu a duat tur a ni tiin fate duat lo thei lo dinhmuna dingah a inngâi
tlat bawk. 11

Nasa Taka Tawngtai leh Inchhîra Mahni Inenlêt A Tûl

Pathian thuawihna leh A duhzawng zawmna a awm loh chuan chhûngkaw zîngah meuh pawh
hmangaihna hian a daih rei thei lo. Kan rilru chakna leh theihna zawng zawngte hi Krista
nungchang nen a inrem vek tur a ni. Pathian hmangaihna leh tihna nei nu leh pate chu
chhûngkaw rorelnaa an ngaihdan a inthuhmun a, an inlungrual theih bawk chuan tawngtai tam
an mamawhzia leh mahni inenlêt a tulzia an lo hria ang a. Chutia Pathian an auh lâi ngei chuan
rinnaa tawngtainate chhang thintu vana vantirhkohte, anmahni vêng tura lo awm rengte hmu
turin an mit chu tihvarsak an ni ang. An nungchang famkim lohna laite chu an hneh ang a,
famkimna-ah an lût tawh bawk ang. 12

Thinlung Phuarkhawmtu Hmangaihna Hruihrual Fêi Tak Chu

Nu leh pate u, in thinlung chu a nghet thei ang ber leh a hlim thei ang berin inzawmtir rawh u. A
inmihran zawnga kal lovin inhnaih deuh deuh ula, tichuan in hnên lama in fate thinlung
hmangaihna hruihrual fêi taka phuar khawm turin in inbuatsaih tihna a ni. 13 Tun leh chatuana
tân chi chu theh zel rawh u. Van zawng zawngte khian Kristian nu leh pate hna thawk lâi chu an
lo thlîr reng a nia.

Sources: 1. Counsels to Teachers, Parents, and Students, p. 127. 2. Review and Herald, March
30, 1897. 3. Review and Herald, March 13, 1894. 4. Pacific Health Journal, April, 1890. 5.
Testimonies for the Church, Vol. 1, pp. 156, 157. 6. Id., p. 156. 7. Manuscript 79, 1901. 8.
Review and Herald, March 30, 1897. 9. Signs of the Times, March 11, 1886. 10. Review and
Herald, June 27, 1899. 11. Review and Herald, March 13, 1894. 12. Manuscript 36, 1899. 13.
Review and Herald, Sept. 15, 1891. 14. Review and Herald, Sept. 15, 1891.