*KOHHRANA ZAWLNEI POST A BONA CHHAN*

Rev. H. Laldintluanga

Zawlnei chungchang leh an hna te, zawlnei awmzia chu Revd Chauțhuaman fiah takin a sawi tawh a,
ka sawi thui ve lo ang. Amaherawhchu Thuthlung Hluia zawlnei sawina țawngkam deuh bik pathum
erawh han tar lang leh hram ila.

1) _roeh_: Hei hi Hebrai thumal pakhat _raa_ ațanga lo kal a ni a, 'hmu' tihna a ni a. Chuvangin
_roeh_ chu *hmu theitu* tihna a ni.

2) _hozeh_: hei hi Hebrai thumal _hazâ_ ațanga lo kal a ni a, a awmze bul chu *hmu, thlîr* tihna tho
a ni.

3) nabi: Hei hi zawlnei sawina țawngkam tlânglâwn ber a ni. He țawngkam țobul chungchangah hian
ngaih dân hrang hrang a awm a. Tunlaia ngaih dân tlanglâwn berah chuan Hebrai thumal _nabâ_
ațanga lo kal niin an hria a; a awmzia chu 'ko, thu puang chhuak' tihna a ni (Revd Chuauțhuama,
_Zoțawng Bible Dictionary,_ 2013:1135).

Zawlnei hna (prophetic ministry) pawh hi huaisen tak leh tlang taka Pathian thu dik puan chhuah
(forth telling) hi a ni a, thil lo awm tur sawi lâwk (fore telling) a ni ber lo. An thuhril miin an awih loh
erawh chuan a nghawng tur an sawi lawk ve chauh zawk a ni.

*Kohhran țiak tirah chuan zawlnei post a la awm*

Ephesi 4.11-ah khan, "Tichuan mi țhenkhat chu tirhkoh atan, mi țhenkhat chu zâwlnei atan, țhenkhat
Chanchin Țha hriltu atan, țhenkhat kohhran enkawltu leh zirtirtu atan a ruat a," tih kan hmu a (Bible
lehlin thar).

Thuthlung Thar kohhran țiak tirah chuan zâwlnei post chu a la awm ve ngei mai.

Kohhran a lo țhang zel a, chutih rualin kum zabi khatna ațangin kohhran chu zirtirna dik loin a bei ve
nghal a, a tibuai nasa hle a. Chung zingah chuan Montana zirtirna kha a ni. Montana zirtirna
(Montanism) hi a tichhuaktu chu Montana a ni a, amah hi Phrygia (Frugia) ram kohhran pastor a ni.
Montana zirtirna hi zirtirna dik lo dangte nen a inang chiah lo va. He zirtirna hi rinna dik lo ni lovin
Thlarau Thianghlim chungchanga zirtirna hleihluak zawnga kalpuina a ni.
Kum zabi hnihna bul lam ațangin kohhran nunin tlâk hniam lam a pan țan a. Ringtu tam takin an
hmangaihna hmasa leh Krista ram tana an țhahnemngaihna an hloh țan a. Hetih hun lai hian kohhran
a lo puitling țan tawh hle a, inawp dan leh kalhmang lam thuah pawh a inhmang nasa sawt hle a.
Heng thil avang hian kohhranin Thlarau Thianghlim hnathawh ngaihsak tâwk lova hriatna mi
țhenkhat rilruah a lo awm a. Kohhran hruaitute chu Thlarau Thianghlim hnathawh hlamchhiahah an
puh a. Kohhran nun chu ro leh tuihnâng nei lovah an puh bawk a ni.

Chutiang taka kohhran nun a tlakhniam a, siam țhat ngai taka a awm lai chuan Montana zirtirna hi a
lo chhuak ta a. Pentikos nia kohhran ang kha din thar leh turin a hnung zuitute nen chuan an bei ta a
ni. Montana chuan harhna danglam tak changa inhriain Thlarau Thianghlim hmanraw pawimawh
berah a inngai a. Zâwlnei hmeichhe pahnih Priskilli leh Maximilli ten an țawiâwm nghal a. Heng
zawlnei pahnihte hian harhna an chan ațangin an pasalte țhen țulin an hria a, an țhen nghal bawk a
ni. An harhna kalpui dan chu a hleihluak tawlh tawlh avangin kohhran chuan a ngai thei ta lo va,
zirtirna dik lovah a ngai a, a hnâwl ta hial a ni.

Montana chuan Pathian inlârna thlen famkimnaa inngaiin amah leh a hnungzuitute hnenah Thlarau
Thianghlim inhriattirna famkim chu thleng famkimin a zirtir a. Chuvang chuan Thlarau Thianghlim
huna chêng kan ni tawh an ti a. Phrygia rama Pepuza khua chu hmunpuiah an siam a. Krista chu kum
sâng lalram din tûrin Pepuza khuaah a lo kal dawn an ti a. Mipui sang tam tak Pepuzaah chuan pung
khawmin Krista lo kal tûr chu an hmuak a. Mahse an beisei angin Krista chu a lo kal ta lo. Krista chu
hmuak thlâwn mah se Pepuza khua chu Jerusalem tharah an puang ta tho a ni.

Montana zirtirna chu kum AD 157 vel khân a darh țan a, a țhang chak hle. Rom-ah leh Africa hmar
lamah te a darh a. A darhna apiangah kohhran a tibuai em em zêl a ni. Montana leh a hnungzuituten
kohhran an sawisel reng avangin kum AD 160-ah Asia rama Bishop-te chuan inkhawmpui
(Synod/Council) an ko va, Montana zirtirna chu zirtirna dik lovah ngaiin an hnâwl a, a zirtirna
pawmtute pawh kohhran ațangin an hnawt chhuak a ni. Kohhran chhunga an len tâk loh avang
chuan Montana zuitute chuan kohhran an din ta a.

Montana zirtirna chuan kohhran nunah nghawng tam tak a nei a. A țha lama a nghawng pawh a awm
țeuh tho. He zirtirna avang hian ringtu mi mal mal hnena Thlarau Thianghlim thiltihtheihna leh
malsâwmna pek thu inzirtir thar leh a ni. Khawvel laka inlak hrana thianghlim taka nun pawimawhna
te uar thar leh a ni bawk.

Montana zirtirnain Thlarau Thianghlim hnathawh a hleihluak zâwnga a kalpuina chuan Thlarau
Thianghlim thilpek ngaihsanna a titlahniam a. Krista lo kal an beisei thlâwnna chuan kum sang lal ram
beiseina thurin pawimawhna a tinêp. Zâwlneite chauhin sual ngaihdamna an nei tia an zirtirna chu
kohhranin nasa takin a dodâl a ni. (Lalchhuanliana & Lalrinawma, Kohhran Chanchin, 1015:26-28).
Hei chang hi a ni lo, kohhran hmasaah khan kohhran hruaitute an insiam a. Kan sawi tawh angina
Paula lehkhathawn ațanga a lan dan chuan rawngbawltu mi chi hrang pariat lai an awm a ni. Chung
rawngbawltu chi hrang pariatte chu: 1) Tirhkohte, 2) Zawlneite, 3) Chanchin |ha hriltute, 4) Pastor-
te, 5) Rawngbawltute (Deacons), 6) Upate (Elders or Presbyters), 7) Hmeichhe rawngbawltute
(Deaconnesses), 8) Bishop-te hi an ni a.

Kan hriat angin kohhran hotute zingah zawlnei tih an awm a nih kha. Chutih rualin Thuthlung Thara
zawlneite hi Thuthlung Hluia zâwlneite nen an dinhmun a inang chiah lo. Thlarau Thianghlim thilpêk,
a bika changtute an ni a. An hna ber chu Chanchin |ha hrila hmun hrang hranga zin kual a ni. Mahse
kum za bi hnihnaa Montana zuituten Thlarau Thianghlim thilpêk hleihluak taka an chan leh kalpui
avang khan kohhranho zingah zawlnei rawngbawlna ngaihnêpna a awm ta a. Chumi avang chuan
zâwlnei pawimawhna chu zawi zawiin a bo ta a ni. An rawngbâwlna chu nemngheh rawngbawltuten
an rawn chhunzawm ta zâwk a ni (Lalchhuanliana & Lalrinawma, Kohhran Chanchin, 2015:31).

Zawlnei post tihbona chhan lian tak pakhat chu Montana zirtirna vang a ni tih kan lo hre ta a. A tira
an bul țanna leh an țhahnemngaihna kha chu a hlu hle. Kohhran pawhin thlarau lam malsawmna
thar an dawnna a ni a; mahse an kal thui tulh tulh a, an inti rau tawlh tawlh a. A tawpah phei chuan
zawlnei ngaihnêpna nen lam a lo chhuah phah a; kohhran țiak tira kohhran rawngbawltu pawimawh
tak post ni si kha a bo hlen ta a ni. Tun thlengin kohhran pangngai chinah tu man a hranpain zawlnei
post an siam tawh lo. Paulan, Thlarauah awm rawh u, a tih hi (Gal 5.16), Awm thlarau rawh u, a ti
emaw ti tlat kan tam a. Chu chuan Thlarau hruaia awm aiin awm thlarau tumna a hring chhuak zel a
nih hi.

*Zawlnei hi kan mamawh rêng em?*

A thu hrimin Montana zirtirna hian zawlnei ngaihnêpna hi rawn hring chhuak lo pawh ni se, kohhran
hian he post hi kan mamawh tawh chuang lo ang. Lal Isua min chhandam chhan hi ngun taka
ngaihtuah chuan kan dinhmun ngaia kan kîr lehna tura chhandam kan ni.

Lal Isua chhandamnain a tum ber chu kan dinhmun ngaia kir lehna a ni. Kan dinhmun hmasa chu
mihring famkim nihna a ni a, chu chu Adama leh Evi te bawhchhiat hmaa an nun dan ang kha a ni.
Thlarau lam dinhmunah chuan Pathian nena inpawlna famkim an nei a. He inpâwlna famkim nun
ațang hi chuan tuna thil mak kan tih tam tak hi thil mak a ni lo. Taksa lama an dinhmunah pawh
damloh, natna an tuar lo a, ramsa leh nungchaten an tina thei lo a. Thosi leh vaihmite ațanga natna
tuar theih chi te, rannung seh ațanga thihpui tham natna kan hriat ang chi te, virus ațanga natna
insiam thei (eg. conora virus) zawng zawng te, an taksaa natna siam theitu zawng zawng khan eng
mah an ti thei lo a, an thuhnuai awm vek a ni tih a hriat a. Chu bâkah ramsa leh nungcha dang zawng
zawng te, thlai leh hlo, tûr nei kan tih zawng zawng chen khan inhaw lo leh intina tawn loin Eden
huanah khan an khawsa thei vek niin a lang. Chaw an mamawhin thlai leh theiin an chaw tur an
chhuahsak mai a. DNA kal sual avang te, hormone imbalance kan tih avanga tuna kan buaipui pian
sualna zawng zawng te, sual leh a hnathawh zawng zawng boin, Pathianin a siam ang takin an
khawsa a ni. Engtia rei nge hetianga an khawsak hi hriat a ni lo a; mahse a rei emaw rei lo emaw an
awm dan phung hrim hrim kha mihringte awm dân tur ang taka Pathian ruahman dân chu a ni.
Chutiang atan chuan Lal Isuan min chhandam leh a, chu famkimna lam chu nakinah hun hnuhnunga
a lo kal leh hma zawng chuan kan pan zel a ni.

Kan awm dân ang tak ni leh tura chhandam kan nih si chuan Pathian nêna inpâwlna famkim a awm
nghal tihna a ni a. Hei hi Lal Isuan min chandam chhan leh chhandamte awm dân tur tak chu a nih si
chuan chhandamte hian zâwl thupuan hi eng vanga buaipui reng nge kan nih? Eng vanga zâwlnei
rawng kai deuh hi lâwm viau leh mamawh viau nia inhria nge kan nih le?

Lal Isua chhandamna hnathawh dan leh a chhandamna chang tawhtute, Thlarau Thianghlim a hruai
ngeite tan a hranpaa zawlnei nih hran a ngai tawh lo a. Thuthlung Hlui huna a bika pâwl bik ang kha
ngai tawh loin kohhranah, a kohhran kal tlangin a inpuang zel a. Hei vang hian kohhran huang
chhungah Thlarau dawng bik awm a țul tawh lo a, a kohhran hmanga a inpuanna zelah hian zawlnei
hna chu kan thawk tlang ta a ni. Mizote phei chu kan inkhawm zing nasa mai si a, kohhran kal tlang
hian Pathian aw hi dawng mawlh mawlh tur kan ni. Sual do tur a awm leh kan do tlang a, siam țhat
ngai a awm leh kan siam ťha tlang zel ang a, kohhran committee kal tlanga thil țha ti tura hma lam
kan pan zel hi zawlnei hna thawk tura min thlanna kan tihhlawhtlinna zel chu a ni e.

Lal Isua khan amah zuitute hnenah khan, Tu pawh mi ring chuan thil ka tihte hi ani pawhin a ti ve
ang; heng aia thil ropui pawh hi a la ti ang, Pa hnênah ka kal dawn avangin, a ti a (Jn 14.12).
Pathianin min duh dân leh heti hian awm leh se min tih dân tak chu kan sawi tawh angin mihringte
bawhchhiat hmaa mihring a siam dân ang tak, mihring famkim nihna ang kha a ni. Chu mihring
famkim nihna chu Lal Isua khan leia a awm lai khan a rawn târ lang leh a. Thil mak leh ropui kan tih
zawng zawng te pawh kha mihring famkim tih atan a mak lo a; mahse famkim lote khan mak kan ti
mai a ni, famkim ve ila a mak hauh lo ang. "Lal Isua kha mihring aiin a chungnung zawk kan ti tur a ni
lo a, keimahni zawk hi mihring kan tling lo tih zawk tur a ni,” tih a nih kha. Tihdam theihna, mitthi
kaih thawh theihna zawng zawngte pawh kha mihring famkim ni ve ila chuan kan tih ve theih vek tur
a ni a. Tûn apangin famkim lo chung chung pawh amah ringa zuitute kutah chuan a la dah tho a nih
hi. Pathianin min siam dân hi a lo makin a lo va ropui em! Hei vang hian kan famkim hun hi nghakhlel
taka thlir tur kan ni. Chu famkimna ngei chu hun hnuhnunga Lal Isua lo kal hunah amah ringtute
chuan kan chang ngei dawn si a.