KA HRIAT ṬHIN YMA CHU!

YMA member i nih chuan tûn hnai chho a YMA chungchanga thil thleng ṭhin leh he pâwl
Mizo zawng zawng huapzo pâwl thianghlim ni ṭhin kha, tute emaw mi firfiak tlemte avanga
a hminghliau leh ṭhin hian i rilru a tina vein, ngaihtuahna i sêng zui ve ṭhin lo anih chuan
thil mak tak a ni ang.

YMA thuthlung point sawmna-ah chuan tihian a inziakin kan sawi rual ṭhin a. "YMA
member ka nih avangin, Mizo hnam mawina leh, YMA thianghlimna puangchhuaktu ni
tûrin, ka nunphungah ka fimkhur reng tûr a ni" tiin.

Ka hriat ṭhin YMA kha chuan hmeithai leh pachhiate, humsual dai palh te, chanhai leh
riangvai zâwkte hnêm tûrin a sûr a sa hnuaiah mahni inphatin a feh chhuak ṭhin a, mitthi
leh chhiat tâwk an awmin theihtawpin a tuam hlawmin a thlamuan ṭhin kha a ni a, tunah
zet chuan thil a lo danglam zo ta hret hretin YMA leh YMA pawh mahni inthiam chawpna
dân siam zo lovin kan in ep ta ut ut mai!

Khawpuiah phei chuan kan tûnlaina avang bawkin thlân laih leh khawhar in riah pawh ṭul lo
kan tiin kan bansan mek zel a. Mitthi in a tlaivar tûr leh khawhar in riak tûr ṭhalai pawh kan
inhmu zo ta bar hlawm lo chu anih hi.

YMA thuvawn "Ṭanpui ngaite ṭanpui" tih leh a thiltum (Aims and objectives) pathumna,
"Kristian nun dan ṭha ngaihsan" tih chu tute emaw mimal hmingṭhat duh luat avangin kan
daibaw palh ta fova, mi rethei leh harsa te chênna in tûr sak sak ṭhin khan YMA hming
meuh hawhin kan tihchhiatsakin, chhiatni ṭhatni a tlawmngaia tlaivara, har mei nun ṭhin
leh thlân lai ṭhin khan, mi ṭhen khat kan ngam zawngte chu vuitu tûr pawh hmu zo lovin
kan ensanin baihvai takin kan siam ta fo mai.

Zosap Missionary ten Kohhran leh kan hnam tha tichak tura Mizo zawng zawng huapzo
tlawmngai pâwl an din, khawvel hnam dang te paw'n an neih ve loh leh kan inchhuanna
ber kan hnam timawitu YMA chuan a thiltum ni tinin a hloh hret hret a, mi ṭhen khatin
political platform-ah an lo hmangin verther takin kua an hreuh a, an duh tâwka YMA hming
hawha an lâr hnuin hmingchhiat chauh hlawh turin an kalsan leh daih ṭhin.

Tûn hmaa hruaitu thlan nikhuaa, "Ani zâwk hi a ṭha ang, Ani zâwk hi ni rawh se," ti a
tlawmngai chunga mawi taka inhnawn ṭhin kha a rûkin kan campaign ta fer furin lam ṭang
kan insiam fir fer a, ka huaiin ka fing ta ber emaw inti, "hruaitu" ni lovin "hotu" branch
tinah an kat ta nuk mai anih hi!

YMA FLAG :
YMA flag rawng hrang hrangin a entir te hi han tarlang thar leh lawk ila. YMA official colour
chu rawng chi thum, a khamphei zâwng (horizontal stripe)-a intiat vek a ni a, hêng rawng
chi thum YMA Flag-a kan hman te hi Mizotena rawng an siam thiam ve hmasak berte an
nih avangin, heng rawng pathumte hian chu chu a entir tel bawk a ni.

A chung berah rawng Sen (Red) a awm a, chu chuan YMA lârzia leh enna a entir a. YMA
chuan khawtlang tan nasa takin hna a thawk a, a hnathawh ṭhat em avang chuan pawl lar
tak leh mite hriat hlawh tak a ni tih a entir.

A laia rawng Var (White) chuan thianghlimna a entir a. YMA chu Tlawmngai pâwl a ni a, mi
rethei leh hausa pawh a huam vek a, thlei bîk nei lo vin mipui a kaihruai ṭhin a. Chuvangin,
YMA inkaihhruai dân chu a thianghlim êm êm a ni.

A hnuai ber rawng Dum (Black) chuan retheihna, beidawnna leh hmuingil lohna a entir a,
chu chuan chanhai, riangvaite leh pachhiate ṭanpuitu a nihzia a tilang a ni.

YMA EMBLEM/LOGO :
YMA chhinchiahna (Emblem/Logo) chu mei alh êng kutin a keng lai lem a ni a, chu chuan
YMA chu pawl lâr tak a ni tih a entir a. A laia mei alh êng pathum YMA tih inziak hian YMA
thiltum (Motto) pathum a entir nghalin, a sira mei alh hualtu êng sen (Focus) sawm (10)
hian YMA thuthlung sawm (10) a entir tel bawk a ni.

Central YMA Executive Committee, September Ni 8, 2018-a ṭhukhawm chuan, YMA

chhinchhiahna (Emblem/ Logo) chungchang an rel a. Emblem-ah hian YMA rawng pathum -
A sen, a var leh a dumte chauh hman tur a ni a, rawng dang telh loh tur thu an tichiang.

YMA Emblem-a a pâwn lama rîn bial chu a duma rîn tur a ni a, meichher kuang pathum leh
mei alh êng anga a thla 10-te chu a sen tur a ni. Meichher kuang pathum chelhtu kut lem
chu a dum niin, rawng hran pek loh tur a ni a, Estd. YMA leh 1935 tih chu rawng duma ziah
tur niin, a inziahna ribbon chu a var, a tlang a dum tur a ni.

Rawng pathum tarlan bak chu rawng dang hmanga chei belh loh tur a niin, Emblem
chhungah rawng dang hmanga background telh loh tur a ni bawk.

Kan hma lawkah YMA Day kan hmang leh mai tawh dâwn. He hla "Rualtin khumtu YMA" Pu
V. Thangzama phuah pawh hi kan sa rual leh ṭhup ṭhup ngei ang. Chutih hun chuan tûnlai
thil thleng avang leh YMA hmangaihna avangin, mi ṭhen khatin he hla hi thinlung na tak
chunga mittui nen an lo sa anih paw'n ka dem hran lo ve. He hla mawi leh ril tak sa chung
hian ka YMA member pui duh takte u thinlung takin i YMA thar leh teh ang u khai. A châng
tin thu te hi a YMA ngawih ngawih asin!
 RUALTIN KHUMTU YMA
Phuahtu : V. Thangzama

1. Hmanah pipu zaleng rual sa leh ral ṭhuam ang a do,

A chhingzo tur zaleng rual awm thei reng hian ka ring lo;

Hranghlui leng zamual an liam a mi tuaitharte an cho,

Rualtin khum zaleng in siam YMA sakhming an ko.

Thunawn :
Ka lenrual lungduhte u phângloten i pen ang u,

Ram riangte hi kan kurpui hmatiang sawnah kan ṭûlpui;

Ram kalsiam tluang a zau e pheikhai thên reng a zang e,

Kan luah ngei dawn e pen r'u raltiang kai i rel ang u.

2. Ânpai lengin an hrilhfak kan Zotlang tluana tlawm mâk,

Khawvel zawng hian an hai lo nghilh thei hianin an mawi lo;

Zawmthawt khua tlai a awm lo lungrualten hma an hlen fo,

Khuangruahsur hal a awm lo tûrni hrang a pawi lem lo.

3. Ami'n sel lo u hmingṭha lo hlan ve u chan ai ṭha,

Hleiten dang lo a thang ri khuatin mawitu a lo ni;

Chanhai riangvaite puitu, thlafam lusunte hnemtu,

Kristian êng chu an lo chhi, duhaisam chu hei ngei hi.

4. Lanu leng leh kan valrual Zorampar chu nangni hi;

In par tin vul a mawi zual in par zu lah a thlum si,

Hnam tin dâwnpui ka nuam e khuai ang lawiin lo leng se,

Dâwnin an ma bil lo'ng e kir zai reng an rel lo'ng e.