Asumer n teγdirawt i kra n wawalen n tmaziγt

Sγur: D.Messaoudi

Deg kra n tutlayin, am tefṛansist ed tneglizit, taγdirawt tetturar tamlilt n usemgarrad gar wawalen. Walit
imedyaten-a:
Tafṛansist: “ saut / sot”, “port / porc”, “sur / sûr”
Taneglizit : “in / inn”, “weak / week”, “whole / hole”

Deg tutlayin-a daγen, zemren sin neγ ugar n wawalen iḥerfiyen ad dduklen akken ad d-fken yiwen wawal
ukris, usbik. Walit:
Tafṛansist: “pourquoi”, “cependant”, “aussitôt”
Taneglizit: “however”, “notwithstanding”, “beforehand”

Acimi ur netteg ara ula d nekkni aya deg tmaziγt aydeg llan aṭas n wawalen ay yettsebbiben uguren ?
Yerna ahat ur ngir ara kan tamawt, acku awalen am wi tebten yakan deg tmaziγt, yerna ggten1. Ihi deg
wayen d-yetteddun d kra n yimedyaten seg mennaw niḍen yessefk ad nesqerdec ed wumi yessefk ad
nesmezgi talγa, akken ad nessegdel i kra n tmukrisin, ladγa tiden-nni yeqqnen γer temsullest.

1. i / ay (pour / que)
- Fkiγ aksum i weydi.
- Aksum ay d-tuγeḍ diri-t.
2. i- / ye- / yi- (état libre / désinence / état d’annexion)
- Netta d ilemẓi; am yilemẓiyen akk, yeḥemmel widen t-yeḥemmlen.
- Yejerrem deg yirgazen ay t-yifen.
3. D / ed / yid / akked (être / et / avec)
- Wa d argaz, ta d tameṭṭut, wi d arraw-nsen.
- Yidir ed Meẓyan d uẓwiren.
- Yidir yedda akked baba-s γer teẓgi. Yedda yid-sen Muḥand.
4. Ger / gar (introduire / entre)
- Tger afus-is deg ukufi.
- Teqqim gar baba-s ed yemma-s.
5. Ar / γer (jusqu’à / à )
- Aweḍ ar axxam-ihin tbeddeḍ.
- Ddu γer wexxam-ihin ad teqqimeḍ.
6. Ddu / ddaw (aller / sous)
- Ddu yid-s ar axxam-is.
- Yeffer ddaw tzemmurt.
7. Akken / akk-nni / akk-n (afin que / comme cela / quelque …)
- Yessared akken ad yeẓẓal.
- Macci akk-nni ay ttarun tamaziγt.
- Akk-n yebγu yili wegris n wedrar, win n uzaγar yetteqqes.
8. Akken-kan (dès que)
- Akken-kan yuweḍ γer wexxam, yexcawet seg fad.
 9. Γef-sawen (vers le haut)
- Ma yedda-d fell-ak yilef, err-as γef-sawen.2

10. Dakken (que)

- Yenna-yi baba dakken tazemmurt ur tettwafras deg tegrest.
11. Dacukan (cependant)
- Zemreγ ad d-εiwneγ amussu-nwen, dacukan macci s yedrimen.
12. Awidukan (tant mieux)
- Bran-as-d yimejlaqen t-yuwin; awidukan !
13. Cwikan (heureusement)
- Wwten-t-id s uldun, cwikan ur t-ḥuzen ara.
14. Swayseg 3 (d’où)
- Amkan swayseg t-id-wwten yeqreb.
15. Swayes (avec lequel)
- Amrig swayes t-id-wwten d abeckiḍ.
16. Aydeg (dans lequel)
- Abrid aydeg yella yetteddu yeččuṛ d ibandiyen.
17. Ayseg (par lequel)
- Abrid ayseg d-yekka ur yeḍmin ara.
18. Swadda 4 (par le côté bas)
- Yella webrid ddaw wexxam-nni; ihi ekk-d kan swadda.
19. Darmi 5 (c’est pourquoi)
- Ziγ ur γer-s idrimen, darmi yugi ad yinig yid-neγ.
20. Uγer 6 (chez qui)
- Uγer d-tuγem idlisen-nni ?

Amawal
- Aḥerfi - Simple
- Asemgarrad - Différenciateur
- Smezgi - Fixer
- Tamlilt - Rôle
- Tamsullest - Ambiguïté
- Tamukrist - Problème
- Taγdirawt - Orthographe
- Ukris - Complexe
- Usbik - Figé

1
Imedyaten : aniγer, aniwer, acuγer, acimi, asmi, werεad, werğin, iwessawen.
2
Am tenglizit (upward); anemgal-is d “γef-kessar” (downward)
3
Akniw n wawal-a d “swanisa”
4
Daγen : “sufella”
5
Neqqar daγen “dalmi” neγ “dimi”.
6
Ta d talγa yettuṣewben d-yekkan seg “uγur”, yebnan s “u+γer” d-yefkan s tezrirt n “u” γef “e” talγa-nni yeccḍen.