Sunteți pe pagina 1din 10

A fratilui mortu.

Iara nă mumă cu ficiori

Cu noau gioni livenzdî

Tu noaua gioni , nă fiată mash

Nă Vasilichiau avdzîtă

Shi vinjiră di alargu aclo

Aleaptsî gionj s u caftă

Ma muma aljei cu noau frats

Trî dari nu vrea s avdă.

Nă dzua vinji , s nu s yinea

Un gione un lai soari

Shi caftă Vasilichiau atsea

Di mushuteatsă avdzîtă

Shi muma ljei cu fratslji tuts

Trî dari nu vrea s avdă

Mash fratili atsel ma njicu

Mash njiclu Costandinu

S bîgă su da , shi u deadiră

Tu xeani atselui gione

- Cî io mi legu , lea muma mea

S ts u aducu duruta sora

Di

cîte oari va ti ljia

Di

cîte oari va u caftsî.

Tu xeani aclo u deadiră

Trei mesi, trei anj diparti

Tu shtiinda si ti mindueshti

Shi mindea ts si scuală

Shi nu tricu multu putsin

S bîgă lingoari greau

Di nu s armasi cioru di frats

Di soi vîru nu armasi

Shi armasi muma singura

Ca erma, ngljisa ncasă

Shi s blastimea shi anathimea

Si u plîndz

laia di njila

Cas nu iara tsel Costandin

Vrea s aibă feata ncasă.

Di multili blasteami aljei

Di a mumălji blasteami

Locu nu didea di Costandin

Lu arca loclu nafoară

Shi si sculă niastimtulu

Mortulu shi ngrupatlu

Di ncalică di asbuiră

La sorsa Vasilichiau

- Sora sora , bunats oara

Ndreadziti ti s vdzim astara

Cî nî andasta muma anoastra.

- Frate frate spunji nj tini

Di

i trî slab i trî ghini

Di

i trî slab , lăili s nji bagu

Di

i trî bun albi s nji pun.

-Aide sora, acshi cum hii

Muma ti shtii shi u shtii.

Shi ncishiră calea nîsi

Cale lunga sh dipartoasă

Cum s ducea, cum imna

Puilji di zgicu s fridzea:

- Tsiu tsiu tsiu sh tsiu

Iu s avdzi mortu cu yiu?

Shi Vasilichiauă cîndu avdzi

Cuvenda tsea a puiljor

Trimburea sh cutrimburea

Sh dzitsea al Costandinu

-Avdzî frate tse batu puilji ?

Cî mortsîlj imnă cu yiili!

- Alasă sora puilji , alasă s bate

Altu lucru nu au tsi s facă.

Elji ma nclo cum s nîrdzea

Altsî pulj calea s tîlja

- Tsiu tsiu tsiu shi tsiu

Iu s avdzi mortu cu yiu?

- Avdzî frate tse dzîcu puilji?

Cî mortsîlj imnă cu yiili.

- Puilji sora tra s cîntă i dată

Nu ti intuia, alasă s bate.

Calu vdzi asbuirinda

Altsî pulji iesu cîntinda:-

-Tsiu tsiu tsiu sh tsiu

Iu s vidzu mortu cu yiu?

- Avdzî frate tsi dzîcu puilji?

Cî mortsîlj imnă cu yiili!

- Puilji sora nu potu tra s tacă

Cî altu lucru nu au tsi s facă.-

- Frate , nj anjurzeshti tsară

Sh nj iasti frică s nergu nhoară-

- Sora, dă naindi sh yinu sh io

Pîn calu s lja nă gură

Cî i durinatu

Cî i curmatu

Cî multu ari imnată.

Cîndu sorsa acasă s dutsea

Intră nîsu tu murmindi.

- Dishcljidi muma buna mea

Dishcljidi muma usha

Cî vinji muma hilja ta

Cî nu u vidzush di anji.

Fatsea muma tsi nu fatsea

Pîn usha si u dishcljidă:

- A lea tini hii , lea feata mea

I ocljili nj m arîdu ?

- Io hiu lea muma cum mi vedz

Io hiu durută mumă

S bîgă s aspune calea ljei

Cum vinji sh cari u adusi.

Atumtsea la bisearică

Nirdzea tra si s inclină

Trî al Costandinu suflitu

Trî al Costandinu ljertari.